خواطر تفسير ايآت من سورة آل عمران

#خواطر_التفسير# (49) فيتبعون ما تشابه منه

ربنا سبحانه وتعالى لما نزل القرآن .. كان فيه آيات مُحكمات ملهاش غير تفسير واحد وماتحتملش اى تفسير تانى .. لأنها كانت بتبقي في أصل الدين وأصل العقيدة اللى المفروض فعلا مايبقاش لها تفسيرين .. وكان فيه آيات تانيه تحتمل اكتر من معنى .. ودى اللى كانت الناس المؤمنه بترجع فيها لرسول الله عشان يبينها لهم.

فالمؤمنين اللى عندهم يقين بالله اتعاملوا مع الآيات كلها تعامل واحد لأنها كلها من عند ربنا وامنوا بيها كلها ونفذوا المطلوب منها بعد مافهموا المراد منها من رسول الله .. لكن المنافقين واللى في قلوبهم مرض كانوا بيشوفوا الآيات اللى تحتمل اكتر من معنى عشان يفسروها على هواهم من غير مايرجعوا للنبي عشان يفتنوا الناس ويشككوهم في دينهم ويعملوا فتنة بين المسلمين وبعض .

وده تفسير قول الله عز وجل في سورة آل عمران .. 

" هُوَ الَّذِي أَنزَلَ عَلَيْكَ الْكِتَابَ مِنْهُ آيَاتٌ مُّحْكَمَاتٌ هُنَّ أُمُّ الْكِتَابِ وَأُخَرُ مُتَشَابِهَاتٌ ۖ فَأَمَّا الَّذِينَ فِي قُلُوبِهِمْ زَيْغٌ فَيَتَّبِعُونَ مَا تَشَابَهَ مِنْهُ ابْتِغَاءَ الْفِتْنَةِ وَابْتِغَاءَ تَأْوِيلِهِ ۗ وَمَا يَعْلَمُ تَأْوِيلَهُ إِلَّا اللَّهُ ۗ وَالرَّاسِخُونَ فِي الْعِلْمِ يَقُولُونَ آمَنَّا بِهِ كُلٌّ مِّنْ عِندِ رَبِّنَا ۗ وَمَا يَذَّكَّرُ إِلَّا أُولُو الْأَلْبَابِ ".

#خواطر_التفسير# ( 50) وتنزع الملك ممن تشاء

في قول الله عز وجل "  قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاءُ وَتَنزِعُ الْمُلْكَ مِمَّن تَشَاءُ وَتُعِزُّ مَن تَشَاءُ وَتُذِلُّ مَن تَشَاءُ ۖ بِيَدِكَ الْخَيْرُ ۖ إِنَّكَ عَلَىٰ كُلِّ شَيْءٍ قَدِيرٌ " .. مواعظ وعبر كتيير للي يتدبر التاريخ والأحداث الماضية والحالية.

لكن لما ربنا يقول .. تؤتى الملك من تشاء .. المفروض عكسها وتأخذ الملك ممن تشاء .. لأن كلمة تؤتي عكسها كلمة تأخذ .. طيب ليه ربنا مقالش وتأخذ الملك ممن تشاء وقال "وتنزع ".. 

وده لأن كلمة تأخذ .. معناها الأخذ باللين واليسر والرضا .. يعني بتاخد من حد حاجة من غير ماتستخدم قوتك .. لكن تنزع معناها الاخذ بالقوة وعدم الرضا من المأخوذ منه .. يعني اللى بتاخد منه الحاجة بيبقي زعلان أنه بيفرط فيها ومش راضي يتنازل عنها فبتاخدها منه بالقوة .. وهو ده المُلك .. ييجي بسهوله على النفس لأن النفس حَبَّاه .. لكن نزع الملك بيبقي على غير الهوى عشان كده بيبقي صعب على النفس اللى خدت ع الملك والسلطان انها تتخلى عن كل ده. عشان كده ربنا قال " وتنزع" لانه بياخد الملك من صاحبه غصب عنه.

عشان كده كل كلمة .. بل كل حرف في القرآن بحساب .. وربنا سبحانه وتعالى علام العيوب .. وكل شيء عنده بمقدار

اللهم علمنا ما ينفعنا وانفعنا بما علمتنا يارب العالمين

اللهم اجعل هذا علما يُنتفع به يارب