تفسير سورة ال عمران

خواطر التفسير :سورة ال عمران

#خواطر_التفسير#(56)إن الله اصطفاك وطهرك واصطفاك

ربنا سبحانه وتعالى بيقول في القرآن في سورة آل عمران للسيدة مريم على لسان الملائكة .."وَإِذْ قَالَتِ الْمَلَائِكَةُ يَا مَرْيَمُ إِنَّ اللَّهَ اصْطَفَاكِ وَطَهَّرَكِ وَاصْطَفَاكِ عَلَىٰ نِسَاءِ الْعَالَمِينَ" ..

ليه ربنا ذكر الاصطفاء مرتين .. يعنى اختار السيده مريم مرتين .. مرة اختيار زمانى.. ومرة على باقي نساء العالمين.

التفاسير بتقول إن الاصطفاء الاول .. أنه اختارها لعبادته وأنها تكون اول امرأة تعبد وتقنت لله في بيت المقدس ولم يسبقها في ذلك أحد. وده نفهمه لما أمها حملت فيها قالت لربنا "انى نذرت لك مافي بطني محررا" يعبد ويخدم ويتطوع في رعاية بيت المقدس ..  على اعتبار أن اللى في بطنها ذكر .. فلما طلعت انثي .. قالت "رب انى وضعتها أنثى .. والله اعلم بما وضعت وليس الذكر والانثى" يعنى في خدمة المساجد .. محصلتش قبل كده .. ومع ذلك تقبلها الله .. عشان تكون الأولى في ده .. وتلاها بعدها بعض النساء .. لكنها كانت أولاهم.

وطهرك .. هنا بيقولوا أنه طهرها من ما يصيب المرأة من دم الحيض .. أو دم مابعد الولاده.

أما الاصطفاء الثانى .. أنه ربنا سبحانه وتعالى اختارها أن تكلمها الملائكة .. وانه نفخ فيها من روحه فأنجبت بدون ذكر .. وتكون هى الوحيدة في نساء العالمين اللى يحصل لها ده .. ومفيش حد بعدها حصل له كده .. عشان كده قال في دى .. على نساء العالمين

#خواطر_التفسير# (57) قال كذلك الله يخلق ما يشاء

ربنا سبحانه وتعالى قال للسيدة مريم لما استفسرت عن كيفية ولادتها لعيسى عليه السلام بدون ذكر .. قال كذلك الله يخلق ما يشاء .. لكن لما سيدنا زكريا استفسر من ربنا عن كيفية إنجابه ليحيي .. قال كذلك الله يفعل ما يشاء

ليه قال هنا يخلق .. وقال هنا يفعل ..

سيدنا زكريا كان بيستفسر عن طريقة إنجابه لسيدنا يحيى .. هل هيخلف وهو كبيير كده وامراته عاقر .. ولا هيرجع شباب هو ومراته .. ولا هيتزوج من امرأة أخرى تلد له الولد .. ربنا اجابه أنه هيخلف على هيئته دى .. رجل مسن وامراته عاقر لا تلد .. فلما استغرب .. ربنا قال له .. كذلك الله يفعل ما يشاء .. لأن ربنا لا يعجزه شيء .. معجزة طبعا أنه يخلف في الوقت ده .. لكن ده مش نوع جديد من الخلق ..دى خلفه عادية من رجل وامرأة .. عشان كده قال يفعل ما يشاء.

لكن لما كانت ولادة عيسى برضه معجزة .. لكن كانت نوع جديد في الخلق .. لأنها كانت من امرأة بدون رجل .. لأن ربنا خلق ادم من العدم .. وخلق حواء من ذكر دون أنثى .. وخلق باقي البشر من ذكر وانثى .. لسه بس أنه يخلق من انثى بدون ذكر .. وكان ده عيسى بن مريم .. عشان كده هنا قال يخلق وماقالش يفعل .. لأنها معجزة .. لكن في نفس الوقت ارتبطت بنوع خلق جديد .. عشان كده قال يخلق ما يشاء.

اللهم علمنا ما ينفعنا وانفعنا بما علمتنا
اللهم اجعل هذا علما ينتفع به يارب العالمين