3 اماكن تسافرهم بأقل من 100 جنيه
تقدر تسافر فين ب 100 جنيه بس؟المقال ده فيه 3 اماكن تسافرهم بأقل من 100 جنيه
1- بورسعيد: بورسعيد تقدر تسافرها بالقطر المميز و ده تكلفته 10 جنيه رايح و 10 راجع و بتحجز التذكرة قبل ما تركب عشان متدفعش غرامة
و المواصلات هناك رخيصة جداً و البلد هادية و مناسبة جداً جداً انك تزورها علشان تشوف اماكن جديدة و تفصل من الزحمة و الدوشة بتاعت طول الاسبوع
من اهم الاماكن هناك :
- المعدية، شارع البازار، بورفؤاد، الفنار، سوق السمك، البحر
2- اسكندرية: القطر المميز بردو ب 11 جنيه رايح و 11 جنيه جاي و بياخد 4 ساعات و لو انت بتدرس تذكرة المكتبة هتبقى ب 3 جنيه بس و القلعة ب 5 جنيه بس
و مفيش اجمل من القعدة علي البحر و انك تشرب كوباية حمص سخن يدفيك في الشتا، اسكندرية جميلة اوي كفاية انك تشم ريحة البحر والله
3- قرية تونس: قرية تونس موجودة في الفيوم تقدر تسافر ليها من القاهرة و تركب عربيات يوسف الصديق او قارون ب 25 جنيه موجودين في المنيب و زيهم وانت راجع و هناك هتشوف ازاي القرية دي اتبنت بسبب الصناعات اليدوية للناس هناك.
هناك بيعملوا الفخار و الخزف و السجاد و هتشوف المدارس بيعملوا ايه و هتقضي يوم في مناظر مش هتلاقيها في اي مكان
تاني
و بكده تبقى مقولة ان السفر محتاج فلوس بس مش دايما صح، السفر قرار!
مستني ايه؟ كلم صحابك و قولهم يلا نسافر!
مستني ايه؟ كلم صحابك و قولهم يلا نسافر!
تعليقات
إرسال تعليق