توك شو رمضاني
من زمان شهر رمضان مميز ببرامج فنية خفيفة ولطيفة " سناكس بين المسلسلات " بيظهر فيها معظم الفنانين كل سنة و يتسألوا نفس الاسئلة تقريباً بإختلاف المذيعين واسم البرنامج وفكرته .
لحد من فترة قليلة ظهر نوع من البرامج زي " برنامج شيخ الحارة " أو بمعني أصح برنامج فضائح أهل الحارة ..
من ملاحظتي لضيوف البرنامج على مدار ٣ مواسم إن فريق الإعداد و المذيعة بيختاروا بعناية الضيوف المثيري للجدل ..
عندهم مشاكل كتير و السوشيال ميديا بتقوم بواجبها معاهم .
الإعلامية بسمة وهبة ..
أول تجربة طلت بيها على الشاشة كان برنامج ديني " قبل أن تُحاسبوا " على قناة إقرأ وكان ناجح جداً لإنه قائم على أساس الخير و تقديم مساعدات إنسانية .
اتميزت فيه "بسمة وهبة " بالحِدة والنبرة الجادة ، وبعد اختفاء طويل رجعت بشكل مختلف بعد خلع الحجاب و تقديم برنامج فني على القناة الأولي .
واختفت وظهرت مرة تانية واعلنت إصابتها بمرض السرطان و الجميع تعاطف معاها لحد ما تعافت من المرض بقوة وشجاعة ورجعت لشغلها كإعلامية .
وللاسف ورا كل اختفاء عودة مفاجأة أكبر .
فبرنامج شيخ الحارة في الحقيقه هو" مسطبه " تفضح فيها الضيوف بكل خلافتهم الشخصية مع أي شخص في حياتهم وتفضل تضغط بحرفية على نقط ضعف كل ضيف ومشاكله وتستفذه عشان الحلقة تولع و التريند يعلى ..
لدرجه بتوصل الضيوف إنهم بيتعبوا نفسياً من الهجوم و الضغط .
هو إيه استفادة المُشاهد من النوع ده من البرامج ؟ وإيه المُحتوى المهم اللى يعود عليه من التدخل في حياة الناس بالتفاصيل دى ؟
وليه في شهر فضيل زى رمضان!
وفجأة العالم اتغير من بيوت ليها أبواب مُغلقة لمشاع أي شخص يحكم على غيره وينصب مشنقة و يعدم بدون وجه حق .
اتمنى النوع ده من البرامج يختفي تماماً لإنه ليس له معني و لإنه بيساعد على انتشار فكرة الاحكام على الغير ، الحُب والكره المُقرر بموقف واحد .
العالم فيه مشاكل أكبر ممكن نواجها بالتفصيل والضغط ده عشان نفيد ونستفيد .
برافو ❤️
ردحذففعلا لما يبقي الترند علي خصوصيات البني ادمين و الضغط عليهم فده اكتر شي غير انساني
ياريت النوع ده يختفي
و ياريت اللي بيقبلوا بنشر اسرارهم دي ما يبصوش للماده والفلوس اللي من ورا قبولهم للبرنامج ويحترموا نفسهم هما كمان
ف انتظار المقال الجاي 💖💖
شكراً حبيبتي 💙
ردحذف