خليك ايجابي مقاله عن الناس للي بتزعل كتير
"سنحاربهم بالبديهيات"
انت ليه زعلان ! لأ لأ انت قوي ! مفيش رجالة بتعييط ! اجمد شوية في ايه !
جُمل كتير زي دول بقت شعارات بتتردد من كل الناس ، بقى تريند الشخص الفظيع اللي ميقدرش عليه حاجة و مبيزعلش خالص و جبل !
و الناس بقت مشوهة نفسيًا و لبسة وش التمام ! الزعلان بقى بيتكسف يقول انه زعلان ، المشاعر الطبيعية اللي الانسان متكون منها بقت خيبة و ضعف !
الحياة مخلوقة ليل ونهار ، شمس و قمر ، ابيض و اسود ، رجل وست و كمان سعادة وحزن و أي حاجة فيهم لما تزيد عن حدها بيكون فيه مشكلة او مرض بمعني..
مفيش حد مبسوط علطول والدنيا حلوة في عينه و طبعًا محدش على-طول حزين و عنده مشاكل الموضوع كله موازنة بين الشعورين بس الاهم ان كل واحد يأخد حقه و افهم انتَ بتعمل ايه يعني مش عيب إنك تحبط بعد مواقف كتير العيب إنك تتعقد !
مش عيب إنك تزعل من خذلان اتعرضت-له العيب إنك تتعقد و تفقد ثقتك في الناس وتفقد رغبتك في اي شئ ! مش عيب إنك تفشل وتقع العيب إنك تستسلم ! ومش عيب إنك تقول زعلان عشان اي سبب -حتى لو كان تافه- ازعل و قدر قيمة زعلك و اديله الوقت اللي يستاهله بس خليك عايش .
المقاومة والامل والحياة مش انك تلغي شعور الخوف والحزن والزعل بالعكس بإنك تديهم وقتهم و جنبهم بتشتغل وتخرج وتتكلم وتضحك ، إنك تبقى عارف إن الحياة مستمرة و هتكمل واحنا هنكمل فيها حلو أو وحش هنكمل لحد ما يجي وقتنا ونمشي فنكمل حلو لمصلحتنا و لما الزعل يروح والموقف يخلص تتعلم الدرس .
خليك عارف إنك لما تلغي الحزن من حياتك مش هيخليك بطل و قوي ، هيخليك حجر و بالوقت هتفقد شعور الفرحة و هتبقى جماد زيك زي اي آلة بتشتغل بس ، لكن جواها فاضي .
بقلم :مارتينا منير
تعليقات
إرسال تعليق